يازينه يوم اني انا وانتي صغار
توما لبست شماغ وانتي عبايه
بالطول ماناصل ولا خمسة اشبار
دايم نقيس اطوالنا بالمرايه
مابيننا شين نخبيه واسرار
ماغير لعب اطفال كل الحكايه
ماهمنا موجز ولا نشرة اخبار
التسليه صارت وسيله وغايه
وان جا فلم كرتون للقط والفار
نجلس نتابع قصته للنهايه
بالمدرسه نزعل على شان الاصفار
انتي سبب لعبك وانا من غبايه
ياما تهاوشنا على كيس أفشار
انحاش به وافرح بطردك ورايه
وان قلتي يافلان ياويلك من النار
اخاف واستسلم وابين خطايه
وإليا ضربتيني تقل بيننا ثار
وان قلت كافي قلتي ماهو كفايه
وإليا خلصتي ضرب بيمين ويسار
اخذتي الفيشار واللي معايه
والى زعلت وقلت ابا اروح للدار
صحتي وقلتي اسفه يا غلايه
واصدقك وافرح بعد ذيك الاعذار
واجيك لا حاقد والا احمل وشايه
بس لو اشوفك مع بشرغيري اغار
لو كان اخوي أو من أعز اصدقايه
واركض لخوك اقول شفها مع اكبار
عشان يفرض لي عليك الوصايه
هذي طفولتنا براءه وتذكار
دايم نحن اليا ذكرنا البدايه
واليوم ابا اكتبها سواليف واشعار
وافكر انتجها بفلم وروايه
واااااااااااااااااو 
ماشاء الله كلمات بمنتهى الروعه